लज्जा

जिन्दगीको मोलतोलसँगै

जन्मिएको तिम्रो लजालुपन

खै किन बाधक छ

तिम्रै जिन्दगीको इन्द्रेणीका निम्ति ?

तिम्रै लजालुपनको दोबाटोमा

कि समाजको भय छ

कि तिम्रो मनको कसिङ्गर लज्जा छ ?

नत्र जिन्दगीको निस्सारतामा

किन रम्थ्यो होला र तिम्रो पाइला ?

नत्र जिन्दगीको कुटिलतामा

किन अडिन्थ्यो होला तिम्रो सास ?

यदि सीता लजाएकी भए

के उठाउन सक्थिन् त पिनाक धनुष ?

यदि पार्वती लजाएकी भए

के निस्किन्थ्यो र स्वस्थानी व्रतकथाको गौरवरूप ?

वा तिमी द्रौपतीको लज्जाबाट निस्किएको

भीमको प्रतिज्ञाको प्रतीक्षामा छौ ?

वा कुनै नयाँ प्रयोग हो जिन्दगीको

तिम्रो आफ्नै दिलग्गीको ?

प्यारी तिमी

'लज्जाचेत किमुभूषणै' भनेझैं

तिम्रो लज्जा साँच्चै तिम्रो भूषण हो कि

तिम्रो देखावटी अस्थिपञ्जरको प्रयोग ?

म रनभुल्लमा छु ।