जीवनगीत

जीवनका इन्द्रधनुषहरूको आकाङ्क्षामा

समयका अभीप्सित पलहरूमा भुलिनु

परिस्थिति कै दासता हो या
मगजको अस्वभाविक कायाकल्प
म अझै बिलखबन्दमा छु,
पोहोर, हिजो र हरेकपल्ट भएजस्तै ।

मेरो जिगीषाका आयतनहरू
कति हूलका जिजीविषामा अडिएका छन्
मेरो मापनको आधार र क्रमबद्धता
कति न्यायोचित छ समयका अभीष्ट पलहरूसँग
म अझै बिलखबन्दमा छु,
पोहोर, हिजो र हरेकपल्ट भएजस्तै ।

श्लाघा, आत्मश्लाघा र अन्तरश्लाघा वरिपरि
मुक्ताकाश जस्तै टहलिरहने विचार विचरणहरू
अस्वभाविक भावभङ्गीका अनेकन् पत्रहरू
के कति समाहित छन्, जीवनगीतहरूसँग
म अझै बिलखबन्दमा छु,
पोहोर, हिजो र हरेकपल्ट भएजस्तै ।

मेरो कविताजस्तै
जटिलताको लेपनले लिपिएका सम्बन्धहरू
हराएको जीवनको एकसुर लयजस्तै
जीवन घिसारिरहेको जटिल समय
आफैँ बिलखबन्दमा पर्यो कि भनी
म अझै बिलखबन्दमा छु,
पोहोर, हिजो र हरेकपल्ट भएजस्तै ।